உயிரித் தகவலியல் என்னும் பயோஇன்ஃபர்மேட்டிக்ஸ் துறை

அனுபவம் வாய்ந்த உயிரித் தொழில்நுட்பவியலாளர்களால் உலகெங்கும் தொகுக்கப்பட்ட உயிரியல் தரவுகளிலிருந்து வேண்டிய தகவலை எடுக்க உதவும் கணிப்பொறி மென்பொருள் பயன்பாடு உயிரித் தகவலியலில் முக்கியமான பணியாகும்.

உயிரியல் சார்ந்த உலகளாவிய புள்ளிவிவரங்களையும் தகவல் களையும் கொண்டு கணிப்பொறித் தொழில்நுட்பத்தின் உதவியுடன் பகுப்பாய்வு செய்வதே இத்துறையின் ஆதாரப் பணி. மரபணுக்களின் செயல்பாடுகள், செல்கள் முறைப்பாடு, சரியான மருந்துப் பொருள் தேர்ந்தெடுப்பு, மருந்து வடிவமைப்பு, நோயைப் புரிந்துகொள்வது ஆகியவைதான் உயிரித் தகவலியலின் பிரதான நோக்கங்கள். நமது வாழ்க்கையின் சகல அம்சங்கள் மீதும் தாக்கம் செலுத்தும் இத்துறை இப்போது பிரபலமாக மாறிவருகிறது.

மரபணுக்களில் உள்ள அமினோ அமிலத்தின் வரிசைத் தொடரையும் (amino acids sequences), புரதத்தின் அமைப்பையும் பகுத்தாய்ந்து விளக்குவது. புதிய மரபுசார் படிமுறைத் தீர்வுகளையும் புள்ளிவிவரங்களையும் உருவாக்குதல். வெவ்வேறு விதமான தகவல் நிரல்களை எளிதாகவும் செயல்திறனுடனும் பயன்படுத்து வதற்கும், தீர்வுகளை ஒருங்கிணைத்துத் தருவதற்குமான கருவிகளை உருவாக்கி நடைமுறைப்படுத்துதல்.

மூலக்கூறு உயிரியல் சார்ந்து பயன்படுத்தப்படும் பிரபல மென்பொருள்களான ஜி.சி.ஜி., பி.எல்.ஏ.எஸ்.டி. (GCG, BLAST) ஆகியவற்றில் சரளமான அறிவு அவசியமானது. எச்.டி.எம்.எல்., பெர்ள் (Perl), ஜாவா, சி++ ஆகியவற்றிலும் பரிச்சயம் இருத்தல் வேண்டும். விதவிதமான ஆபரேட்டிங் சிஸ்டம்களில் பணிபுரியும் திறன்கள் அமைந்திருப்பதும் அவசியம். குறிப்பாக யுனிக்ஸில் நல்ல தேர்ச்சி இருக்க வேண்டும். டேட்டாபேஸ் திறன்கள் அத்தியாவசியத் தேவையாக கருதப்படுகின்றன. சைபேஸ் (Sybase) அல்லது ஆரக்கிள்-ல் (Oracle) புலமை சிறப்பம்சமாகக் கருதப்படுகிறது.

அறிவியலை மூலப் பாடமாகக் கொண்டு பிளஸ் 2-ல் தேர்வு பெற்றிருக்க வேண்டும். இந்தியாவில் சில கல்லூரிகளில் மட்டுமே பி.டெக். உயிரித் தகவலியல் துறை உள்ளது. பெரும்பாலானவர்கள் இளங்கலையில் உயிரித் தொழில்நுட்பம் அல்லது பிற அறிவியல் துறைகளில் தேர்வு பெற்ற பின்னரே முதுகலைப் பட்டம், முனைவர் பட்டம் பெறுவதற்குத்தான் உயிர்தகவலியலுக்கு வருகிறார்கள்.

உயிரித் தகவலியலில் முதுகலை படிக்க விரும்புபவர்கள் பி.எஸ்சி., பி.எஸ்சி.(வேளாண்மை), பி.சி.எஸ்., பி.இ., பி.டெக்., எம்.பி.பி.எஸ்., பி.ஃபார்ம், பி.ஏ.எம்.எஸ்., பி.எச்.எம்.எஸ்., பி.வி.எஸ்சி. படித்திருக்க வேண்டும்.

மருந்துகள் கண்டுபிடிப்பு, மருந்துகள் மேம்பாடு, மரபணு மற்றும் மரபணு அமைப்பு ரீதியான மருந்து வடிவமைப்புகளில் உயிரித் தகவலியல் படித்தவர்களுக்கு நிறைந்த வாய்ப்புகள் உள்ளன. வேளாண்மையில் பயிர்களுக்கு வரும் நோய்களைத் தடுப்பது, வறட்சியைத் தாக்குப்பிடிக்கும் புதிய பயிரினங்களையும் அதிக மகசூல் தரக்கூடிய பயிர்களையும் உருவாக்குவதிலும் இத்துறையில் படித்தவர்களுக்கு வாய்ப்புகள் நிறைய உள்ளன.

உயிரியல் மற்றும் மருத்துவ ஆய்வுகங்களின் பிரம்மாண்டமான தகவல்நிரல்களை நிர்வகிக்கும் தகவல்தொழில்நுட்ப நிறுவனங்களிலும் உயிரித் தகவலியல் பட்டதாரிகளுக்கு வாய்ப்புகள் பிரகாசமாக உள்ளன. உயிரித் தகவலியலின் உதவியின்றி உயிரியல் மற்றும் மருத்துவ ஆய்வுகளும் மேம்பாட்டுப் பணிகளும் தற்போது சாத்தியமேயில்லை.

கோவையில் வேளாண் பல்கலைக்கழகம் மற்றும் பல தனியார் கல்லூரிகளில் பி.டெக். பயோஇன்ஃபர்மேட்டிக்ஸ் பயிற்றுவிக்கப்படுகிறது.

எம்.எஸ்சி. பயோஇன்ஃபர்மேட்டிக்ஸ், கோவையிலுள்ள அவிநாசிலிங்கம் பெண்கள் பல்கலைக்கழகத்திலும் சென்னை கால்நடைக் கல்லூரியில் உள்ள பயோஇன்ஃபர்மேட்டிக்ஸ் சென்டர் அண்ட் ஏரிஸ் செல் (Bioinformatics Centre and Aris Cell), இன்னும் சில தனியார் கல்லூரிகளிலும் கற்றுத்தரப்படுகிறது.

சைன்டிஃபிக் க்யூரேட்டர், ரிசர்ச்சர், சீக்வென்ஸ் அனலிஸ்ட், கம்ப்யூட் டேஷனல் கெமிஸ்ட், கன்டென்ட் எடிட்டர், பயோஇன்ஃபர்மேட்டிசியன் என பல பொறுப்புகள் உயிரித்தகவலியல் படித்தவர்களுக்குக் காத்திருக்கின்றன.